ШҚО-да әр 50 шақырым сайын жол бойындағы сервистік нысандар салынады

ШҚО әкімі Нұрымбет Сақтағанов Үлкен Нарын ауылына жұмыс сапары барысында жол бойындағы сервистің өңірдегі туризмді дамытудағы маңыздылығын атап өтті. Бұл – аудан орталықтары мен ауылдар үшін де маңызды. Солардың бірі – Үлкен Нарын ауданы әкімдігі мен «QazAvtoJol» АҚ бірлесіп іске асырған жоба аясында ашылған жол бойындағы сервистік нысан. Бұл аудан инфрақұрылымын айтарлықтай жақсартып, туризмді дамытуға қосымша мүмкіндік береді. Жоба сондай-ақ жаңа жұмыс орындарын ашуға және жергілікті кәсіпкерлерді қолдауға бағытталған.

«Туризмді дамыту үшін ең алдымен жол, инфрақұрылым және жол бойындағы сервис қажет. Өткен жылы облыс бойынша 710 шақырым жол жөнделді, биыл тағы 870 шақырым жолды жөндеу жоспарланып отыр. Жергілікті атқарушы органдар жол бойындағы сервистік нысандарға электр жарығы, су, кәріз жүйесін тартып жатыр, ал “QazAvtoJol” жол бойындағы сервистік павильондарды орнатады. Бұл жерде аялдап, демалып, шай немесе кофе ішуге болады», – деді облыс әкімі.

Жол бойындағы сервистік нысанда дәстүрлі рецептпен пісірілген жаңа піскен нан өнімдерімен, түрлі кофе түрлері мен қоспаларымен экспресс-кафе, сондай-ақ азық-түлік пен ең қажетті заттарды сататын дүкен бар. Бұған қоса, бұл нысан бірнеше орындық дәретханалармен, оның ішінде мүмкіндігі шектеулі жандарға арналған санитарлық аймақтармен, ана мен бала бөлмесімен және намаз оқуға арналған арнайы бөлмемен жабдықталған.

Облыс әкімінің айтуынша, мұндай жол бойындағы сервистік кешендер облыс жолдарының бойында шамамен әр 50-60 шақырым сайын орнатылады.